गर्दी

गर्दी 

 गर्दी वाढली आहे…

रस्त्यांना आता श्वास उरला नाही,

दाटीवाटीच्या लोंढ्यांनी

शहरांची छाती भरुन आली आहे…

कोणी धावत आहे उद्याच्या शोधात,

कोणी कालच्या जखमा लपवत;

काही चेहेरे हास्य फुलवितात,

तर काही आतून तुटत तुटत जगतात…

कोणी विचारांच्या गाभाऱ्यात हरवलेले,

कोणी क्रोधाच्या ज्वाळांनी पेटलेले;

कुणाच्या डोळ्यांत करुणा दाटलेली,

तर कुणाच्या शब्दांत धार विषारी…

अनेक पोषाख, अनेक भाषा,

अनेक धर्म, अनेक दिशा;

कोणी कपाळी गंध लावलेला भक्त,

तर कोणी नास्तिकतेचा ध्वज फडकवीत…

कोणी हात जोडून देव शोधतो,

कोणी माणसांतच देव पाहतो;

कोणी दयाळू, मायेचा झरा,

तर कुणी कठोर दगडासम उभा…

या गर्दीत प्रत्येक जीव

एक वेगळी कहाणी घेऊन चालला आहे;

कोणी हरवलेला, कोणी सापडलेला,

कोणी जगण्याचा अर्थ शोधत आहे…

आणि तरीही—

या अफाट मानवी समुद्रात

सर्वांना हवी असते फक्त

थोडी ओळख…

थोडे प्रेम…

आणि कुणाच्या मनात

आपल्यासाठी राखलेली

एक छोटीशी जागा… 🌹
भास्कर जाधव